Home / Uncategorized / Министерката за одбрана Радмила Шекеринска во посета на Битола

Министерката за одбрана Радмила Шекеринска во посета на Битола


Светот го поддржува тоа што се случува во нашата држава, ни дава поддршка и шанса да обезбедиме подобар живот за сите наши граѓани, истакна македонскиот министер за одбрана Радмила Шекеринска, за време на посетата на Битола.

Во изјава за јавноста, Шекеринска потсети дека владините ветувања се исполнуваат, а инвестицијата во безбедност, овозможи двојни економски ефекти.

-Минатата година, кога Владата најави амбициозна НАТО агенда, многумина сметаа дека тоа е само лажен оптимизам. Се покажа дека тоа што го најавуваме, и тоа што го ветуваме го испорачавме. Нашата држава ја доби поканата за членство во НАТО, за многу кус период ги завршивме пристапните разговори и добивме протокол за пристапување, и очекуваме во исто така брза постапка, да станеме рамноправна членка на најголемиот воено-политички сојуз. Тоа веднаш имаше позитивни ефекти и врз економијата. Во 2018 година странските директни инвестиции беа речиси четири пати повисоки отколку во претходната година. Тие беа двојно повисоки од најдобрата година по странски директни инвестиции, односно 2011 година. Тоа покажува дека нашата одлука, одлуката на нашата држава за инвестиција во безбедност беше оправдана и тоа ќе значи повеќе економски шанси, подобар живот на граѓаните, истакна министерката Шекеринска.

Министерката најави дека ќе продолжи трендот на зајакната економска активност и зголемување на бројот на странски и домашни инвестиции

-Нашиот фокус сега целосно е посветен да продолжи трендот на пораст на платите, да продолжи трендот на зајакната економска активност и зголемување на бројот на странски и домашни инвестиции. Задоволни сме што Собранието го изоди најдолгиот пат во делот на важните закони со кои се обезбеди државна социјална пензија,  зголемување на социјалната помош на лицата на кои најмногу им е потребна, и со тие закони ќе овозможиме поголема еднаквост и поддршка за оние што се најзагрозени- рече министерката Шекеринска.

Како што е познато, сите држави соседи го ратификуваа Протоколот за НАТО, за седум недели девет членки на НАТО завршија со ратификацијата, а минатата недела почна процесот и во една од членките што има подолг процес, а тоа се САД, нагласи  министерката за одбрана Радмила Шекеринска за време на нејзиниот престој во Битола.

Leave a Reply

Your email address will not be published. Required fields are marked *

*