Битолски Весник Весник што се чита и прераскажува 60 години со читателите
Голем број на македонски музичари подадоа рака за помош на петгодишен Давид Домазетовски од Битола, кои утре со почеток во 19 часот во спортската сала „Младост“ ќе одржат хуманитарен концерт. Домазетовски од 22 декември се наоѓа на Одделот за неврохирургија во „Аџибадем Систина“ поради тумор на мозокот на кого по две тешки операции, туморот му е отстранет, но опоравувањето се уште трае, а помошта се уште е потребна.
-Да му помогнеме на Давид и ние да ја извојува најтешката битка. Со секое купување на влезница секој хуман граѓанин активно учествува во неговото заздравување- апелираа денска на прес-конференција организаторите на концертот.
Утрешниот хуманитарен концерт ќе биде отворен од неговата поголема сестра Ева која напиша песничка во чест на својот брат Давид.
На хуманитарниот концерт ќе настапат 30тина изведувачи, меѓу кои Димитар Андоновски, Виктор Апостоловски, Бојан Стојков, Ламбе Алабаковски, „Памперс“, Дарко Илиевски, Александар Белов, Наташа Малинкова, Александар Тарабунов, Наде Талевска, „Мотив бенд“,Татјана Стефановска, “, Елена Велевска, итн.
Организаторите се надеваат дека салата ќе биде преполна и дека граѓаните ќе ја покажат својата хуманост на дело.
Исто така се во преговори со неколку битолски фирми од кои очекуваат да купат поголем број на карти и на тој начин да учествуваат во заздравувањето на малиот Давид Домазетовски.
Помошта од секој поединец, фирма, здружение е добродојдена за петгодишното битолчанче кое целокупната битолска и македонска јавност посакува здраво да се врати во топлиот дом.
Воедно, за сите оние кои сакаат да помогнат, можат да донираат и преку броевите за донација: 077/143-778- за корисниците на мрежата на ВИП, 075/143-502- за корисниците на мрежата на ОНЕ и 070/143-163- за корисниците на мрежата на Т-Мобиле, или пак на сметката на Давид во Комерцијална банка.
Бидете хумани
Б.В.
