Битолски Весник Весник што се чита и прераскажува 60 години со читателите
Организаторите на интернационалниот фестивал на класична музика „Интерфест” , што оваа недела се одржува во Битола, излегоја со иницијатива и собирањето потписи за обнова и ставање во функција на концертната сала во Дом на АРМ која е затворена седум години.
Уметничкиот директор на фестивалот Милица Шперовиќ-Рибарски информира дека иницијативата ја потпишале учесниците на годинешното 23-то издание на фестивалот, публиката и други вљубеници во класичната музика кои сакаат концерти и во познатиот офицерски дом во Битола.
– Нашата граѓанска иницијатива е со цел да се обнови концертната сала во Дом на АРМ во Битола. Книгата досега ја потпишаа стотина учесници на фестивалот, публиката, а ќе се потпишат и други лица кои се залагаат прекрасната сала за концерти во офицерски да се возобнови бидејќи 7 години е затворена. Домот на АРМ во Битола е вистинска гордост, а концертната сала има таква акустика што ја нема на друго место во Македонија. Тој прекрасен простор со огромниот лустер и други деталји е магичен и инспиративен за секој уметник и треба да се обнови, изјави Шперовиќ- Рибарски.
Меѓународниот фестивал на класична музика „Интерфест” завршува викендов со два целовечерни концерти. Вечер ќе настапи италијанката Елоиза Кашо, а утревечер Олег и Ана Кондратенко.
Интерефест во Битола се одржува со поддршка од Министерството за култура, а поддршка добиваат и од Општина Битола.
Б.В.
