Home / Економија / Бизнисмените од Штип и Битола на заедничка маса

Бизнисмените од Штип и Битола на заедничка маса

Триесет компании од Штип и Битола денеска на заедничка средба дебатираа за можностите за соработка и придонесот во развојот на економијата. Организатори на средбата беа регионалните комори со седиште во Штип и во Битола при Стопанската комора на Македонија.

На средбата која се одржа во Штип,присуствуваа претседателите на управните одбори на двете регионални комори Наум Барзов од Штип и Мирко Велковски од Битола, како и претседателот на Стопанската комора на Македонија, Бранко Азески.

 

Азески, ја потенцира важноста на двата најголеми и економски најразвиени региона во земјава. Источниот плански регион со седиште во Штип, претставува 14 отсто од територијата на земјата има 4 пати помал пораст на населението во споредба со наталитетот на Македонија, што директно се одразува врз стопанството. Во Источниот плански регион 14 отсто отпаѓа на земјоделската индустрија, додека носител е текстилната индустрија со 70 отсто застапеност. Во овој регион во интензивен развој се малите и средни претпријатија коишто доминираат со 72 отсто од целокупното стопанство. Карактеристика на Пелагонискиот плански регион е фактот дека малите и средни претпријатија се застапени дури со 90 отсто, односно од вкупно 5.000 правни субјекти, 20 се само големи компании. 100 до 150 се средни, а останатите се мали и микро компании. Двата економски центри на источна и западна Македонија, учествуваат со вкупно 24 отсто во вкупниот БДП на Република Македонија.

Претседателот на Регионалната комора со седиште во Битола, Мирко Велковски, рече дека бизнисот од овие два региона ќе се раздвижи со самото меѓусебно запознавање на деловните луѓе од двата региона и дека се надева на соработка помеѓу регионалните комори со седиште во Штип и во Битола.

 

Присутните претставници на компании од двата региона ги презентираа своите дејности и потенцијали за идна соработка. На деловните средби застапени беа компании од областа на кожарската, текстилната и прехранбената индустрија, градежништвото, металургијата, земјоделието и трговијата. Бизнисмените разменија искуства и мислења за мерки кои се потребни да се преземат за подобрување на климата за инвестирања, а го посочија и проблемот со недостатокот на квалификувана работна сила според потребите на стопанството. Исто така, деловната средба беше искористена како директна можност за воспоставување меѓусебна соработка.

Leave a Reply

Your email address will not be published. Required fields are marked *

*