Битолски Весник Весник што се чита и прераскажува 60 години со читателите
По десетти пат, Битола ќе биде домаќин на „Локум фест“, манифестацијата на која во Старата битолска чаршија ќе се јаде локум, ќе се пие кафе и ќе се слуша музика.
Во Стара битолска чаршија ќе настапат „Етно трип“ од Словенија и групата „Прва севда“ од Македонија.
–Фестивалот е препознатлив синоним на заедничкото живеење на различните култури во конзулска Битола и оној стар обичај со комшијата и добронамерникот да се испие заедничко кафе со локум. Уште еднаш битолската чаршија ќе блесне во целиот сјај и ќе се потсети на традицијата и обичаите по кои е препознатлива нашата чаршија и нашиот град. Годинава на програмата на “Локум фест“ ќе се најдат долгогодишните партнери на овој фестивал Здружението Македонски ракотворби од Битола со саемот на ракотворби, а за музичкиот дел ќе се погрижат музичките групи „Прва севда “ староградска група од Битола и „Етнотрип“ од Словенија- истакна Тоше Ивановски, организатор и претставник на Центарот за културна деконтаминација од Битола.
На фестивалот посетителите преку стари фотографии ќе можат да ја слушнат приказната за Битола низ вековите, а на повеќе штандови ќе бидат изложени ракотворби, изработени од битолчанки.
Во изминатите години на „Локум-фест“ во Битола настапија повеќе од 45 етно-групи од Балканот и од светот.
Б.В.
