Битолски Весник Весник што се чита и прераскажува 60 години со читателите
Деновиве Битола беше дел од паневропската иницијатива Европска кино ноќ, која го слави богатството и креативноста на европската кинематографија.
Од 2 до 6 декември, 88 кина низ Европа ги обединија љубителите на филмот под истото филмско небо, а 3Д Кино Битола беше горд домаќин на овој значаен културен настан.
Настанот беше со бесплатен влез и понуди богата програма која комбинира филмска магија, инспиративни дискусии и музичко уживање.
По свеченото отворање на настанот се одржа проекција на францускиот филм „Вкусот на љубовта“ (The Taste of Things), награден на Канскиот фестивал. Филмот раскажува емотивна приказна за љубовта, храната и страста, со блескавата Жулиет Бинош.
Потоа се одржа дискусија со двајца истакнати гости:
• Филип Чаловски, визионер во гастрономијата кој ја комбинира традицијата и иновацијата во секој рецепт.
• Илија Тирицовски, реномиран македонски продуцент на филм и ТВ, познат по неговите наградувани проекти.
Концертот на Дејание, музички изведувач од Битола, чиј талент и уникатна енергија го пленат вниманието низ Европа ја воодушеви публиката.
3Д Кино Битола преку овој настан уште еднаш ја зацврстува својата позиција како културен центар кој нуди висококвалитетни програми и го доближува европското културно богатство до македонската публика.
Настанот е дел од проектот Europa Cinemas, , кој има за цел да ги истакне најдобрите европски филмски приказни.
Сите љубители на филмот и уметноста уживаа во оваа незаборавна вечер во 3Д Кино Битола.
