Битолски Весник Весник што се чита и прераскажува 60 години со читателите
Деновиве во кампот Ливадишта се одржаа работничките спортски игри на вработените во ЕСМ.
За време на спортските работнички игри, осум екипи од подружниците на АД ЕСМ и Дирекцијата се натпреваруваа во девет дисциплини. На игрите учество зедоа околу 500 вработени кои преку спорт и рекреација го тестираа натпреварувачкиот дух, но и го градеа духот на заедништво и солидарност. Учесниците се натпреваруваа во неколку спортски дисциплини: фудбал, кошарка, одбојка, пикадо, шах, скок во далечина, фрлање ѓуле, крос, пинг-понг.
Во вкупниот пласман, според резултатите од сите дисциплини во кои се натпреваруваа вработените во АД „Електрани на Северна Македонија”, екипата на РЕК „Битола” 1 беше првопласирана, на второто место се најде екипата составена од вработени во Дирекцијата на АД ЕСМ во Скопје, а на третото место заврши втората екипа на РЕК Битола.
Наградата за фер плеј на спортските работнички игри на АД ЕСМ отиде во рацете на екипата од ХЕЦ Црн Дрим и ХЕЦ Тиквеш.
Гости на игрите беа претставници на синдикалните организации од областа на енергетиката од соседните земји: Косово, Србија и Бугарија.
Се организираше и ревијален натпревар во мал фудбал помеѓу екипите на менаџментот на АД ЕСМ и синдикалните претседатели во компанијата. Натпреварот во регуларниот дел заврши нерешено 1:1, но на крај пеналот на претседателот на Синдикатот на РЕК „Битола”, Менде Фидановски им донесе победа на синдикалните лидери.
Спортските игри од овој вид пред се, се организирани за релаксирање и спортување со што на дел од вработените им се овозможува одмор од секојдневните обврски.
Главната цел на игрите, другарувањето, запознавањето и разменувањето на искуства помеѓу вработените од сите делови на компанијата е остварена и игрите покажаа дека заслужуваат да се традиционална манифестација.
Инаку синдикалните игри ги отвори претседателот на синдикалната организација на ЕСМ, Јове Смилевски, а присутните гости и спортисти ги поздрави генералниот директор на АД ЕСМ, Васко Ковачевски, кој изрази задоволство од организацијата и големиот број на пријавени работници-натпреварувачи подготвени за другарување и меѓусебно запознавање.
