Битолски Весник Весник што се чита и прераскажува 60 години со читателите
Вчера, во Битола средба остварија двајцата обвинети за криминал од СЈО, Никола Груевски и Владимир Талески. И двајцата без пасоши и двајцата без чувство за вистинските потреби на граѓаните на Битола.
И наместо да се срамат за своите постапки кои ги направија во битолското образование, блокираните жиро-сметки, огромната партизација, штетата во образовниот процес, тие и понатаму бесрамно продолжуваат да ги искористуваат за партиски цели – велат од Либерално-демократската партија.
Оваа партија обвинува дека во време кога училиштата се на распуст, а наставниците го користат одморот, директорка на основно училиште, кое има неколку години блокирана жиро-сметка од околу 6.000.000 денари, ги отвора вратите на училиштето и прима во посета претседател на политичка партија. „При тоа, истата таа директорка заборава на Груевски да му нагласи дека училиштето должи за струја, вода и основни комунални услуги. Директорката очигледно заборавила до каде се нејзините ингеренции и која е нејзината улога во образованието. Во исто време, директорот на Центарот за култура и претседател на Општинскиот комитет на ДПМНЕ, наместо да се грижи за работењето на институцијата, се шета низ Битола со Никола Груевски, со што директно ја вовлекува политиката во полето на културата“.
Поради ваквата груба партизација, ЛДП бара Владата на Република Македонија, во пресрет на новата учебна година, итно да ги одземе ингеренциите на Општина Битола во делот на образованието бидеќи децата со ништо не заслужиле да ги водат вакви директори. „Исто така, бараме од министерот за култура, Роберт Алаѓозовски, уште денес да го разреши директорот на Центарот за култура во Битола бидејќи за партиски послушници нема место во културните институции“ – додаваат од ЛДП.
