Битолски Весник Весник што се чита и прераскажува 60 години со читателите
Градоначалникот на Општина Битола Тони Коњановски и заменичката на постојаниот претставник на УНДП во земјава, Сања Бојаниќ, им доделија сертификати на осум образовни и лични асистенти на ученици со попреченост во средните училишта во Битола.
Асистентите што добија сертификати стануваат конкурентни на пазарот на трудот и имаат олеснителна околност при вработувањето.
Градоначалникот Коњановски истакна дека преку Програмата Општинско-корисна работа, која се имплементира од 2017 година во партнерство со Програмата за развој на Обединетите нации, работно се ангажирани 23 лица.
-Од нив, 13 се образовни и лични асистенти за ученици со попреченост во средно училиште, од кои десет во средното општинско училиште „Таки Даскало“, еден асистент во медицинското училиште д-р „Јован Калаузи“ и два асистенти во средното земјоделско училиште „Кузман Шапкарев“-рече градоначалникот Коњановски и додаде дека за Општината Битола преку оваа програма се прави чекор напред во инклузивниот процес на децата со попреченост и се остварува нивното право на образование, заедно со нивните врсници во образовните институции во Битола.
-На овој начин, им овозможуваме преку соодветно образование, да се стекнат со знаења и вештини кои ќе им овозможат постепено вклучување на пазарот на труд и социјална инклузија, како еден од најважните чекори во нивниот натамошен животен развој. Со реализацијата на проектите со поддршка на УНДП покажуваме дека како локална самоуправа, особено се грижиме за младите и за нас е многу важно тие да бидат дел од општината, нејзиниот развој и тука да ја гледаат иднината и својот кариерен напредок, тука да создаваат семејства и да ја сакаат Битола, која по многу нешта е единствена-додава Коњановски.
Буџетот во Програмата за социјална заштита за општинско корисна работа изнесува 3.700.000,00 денари од кои 1.500.000,00 денари се средства од Општина Битола, а 2.200.000,00 денари се донаторски средства од УНДП.
Општината Битола, заедно со УНДП во текот на оваа година, реализира уште два проекти.
Првиот проект е зајакнување на улогата на младите во Општина Битола чија цел е надминување на проблемите поврзани со говорот на омраза и деструктивни наративи кои произлегуваат од врсничкото насилство, како и подлабоко разбирање на младинското учество.
Во тек на реализација е и проектот РеЛОаД 2, во рамките на Регионалната програма за локална демократија во Западен Балкан 2 (РеЛОаД 2), финансиран од Европската унија, од инструментот за претпристапна помош (ИПА) и спроведуван од Програмата за развој на Обединетите нации (УНДП).
Васка М.Младеновска
