Битолски Весник Весник што се чита и прераскажува 60 години со читателите
По дупењето на гумите на 6-те службени возила на Регионалната дирекција во Битола, УЈП Битола како што најави не само што не се повлече пред заканите на насилниците туку ги засили и заостри контролите.
Дванаесет тима на даночни инспектори, во текот на вчерашниот ден извршија акциска контрола во над 50 објекти на подрачјето на Битола и Прилеп.
Од вкупно 50 контролирани субјекти дури кај 23 правни лица и одговорните лица (Битола 11 и Прилеп 12) се констатирани неправилности во работењето кои работеле спротивно на Законот за регистрирање на готовинските плаќања.
По констатираните неправилности изречени се глоби во вкупен износ од 69.000 евра во денарска противвредност, а во зависност од прекршокот објектите се затворени на 15, или 30 дена.
При контролите во Битола откриено е дека во 10 објекти не се издаваа фискални сметки, и затоа ќе бидат затворени 15 дена, а за два објекти изречена е мерка затворање од 30 дена поради непоседување на фискален апарат.
Во вечерните часови, даночните контроли се проширија на подрачјето на Прилеп.
Во сите контролирани објекти во кои се вршело трговија со прехранбени производи, инспекторите на УЈП утврдиле неиздавање на фискални сметки, поради што покрај паричната глоба, во период од 15 дена ќе бидат затворени деловните простор на 12 правни субјекти.
-По неодамнешниот инцидент во Битола каде непознати сторители оштетија шест службени возила, УЈП јавно најави дека ваквото однесување само остава простор за поголемо сомнение дека во конкретната општина и подрачје работат бизниси кои избегнуваат да платат данок, што се потврди и со наодите за нерегистрирање на готовинските плаќања и неиздавање на фискални сметки констатирани во 10 објекти, кои ќе бидат затворени 15 дена, нагласија денеска во Регионалната дирекција на УЈП Битола, од каде нагласија дека тие и во наредниот период ќе продолжат со засилени контроли и дека никакви закани или притисоци нема да ги предмисли да ги принди правните лица да работат согласно законските прописи.
Б.В.
