Битолски Весник Весник што се чита и прераскажува 60 години со читателите
Не само во градските средини, туку и во селата во Битолско, се подобруваат условите за спорт и рекреација.
Таквите проекти добиваат на приоритет, бидејќи и владините заложби се што повеќе спортски центри и објекти да се отвораат во државата, се со цел младите се повеќе да спортуваат и рекреираат бидејќи физичката активност автоматски позитивно влијае врз нивното здравје.
Токму реализацијата на еден таков спортски проект, во петокот, ги израдува жителите во битолскот село Логоварди, откако во употреба беше пуштено повеќенаменско спортско игралиште.
На овој ветен и реализиран проект, се израдуваа сите жители на селото Логоварди, особено од помладата популација кои бараа од Општината Битола да се изгради игралиштето.
Битолската локална самоуправа им излезе во пресрет на жителите, предвиде средства во буџетот и пристапи во подготовка на проектна документација.
-Во почетокот на 2016 година се подготвуваше проектот за изградба на ова игралиште и штом добивме одобрение за градење се пристапи кон реализација. Вкупната вредност на ова игралиште изнесува еден милион и 605 илјади денари – изјави Маријана Спасевска, раководител на одделението за комунални дејности во Општина Битола.
Со изградбата на повеќенаменското игралиште се создаваат подобри услови за спорт и рекреација на децата и младите од село Логоварди.
Мештаните изразија големо задоволство од реализацијата на овој за нив приоритетен проект и одличната соработка која во изминатиот период ја имаат со градоначалникот Владимир Талески и битолската локална самоуправа.
Б.В.
