Премиерот Христијан Мицкоски, градоначалникот на Битола Тони Коњановски, како и пратениците од Битола во македонското Собрание го означија почетокот на изградбата на булеварскиот влез за Битола од страната на Прилеп.
![](http://bitolskivesnik.mk/wp-content/uploads/2024/07/miczkoski-444.jpg)
Мицкоски рече дека со булеварскиот влез, Битола ќе добие нов изглед како што му доликува на конзулски град и вети дека во следниот период околу 14-15 милиони евра ќе бидат инвестирани во проекти за градот под Пелистер.
-Очекувам брза реализација на овој булеварски влез. Пратениците грчевито се бореа а и сега и покрај тоа што Владата ја преводи ВМРО-ДПМНЕ се борат за секој проект повеќе за градот. За мене Битола има посебно значење во делот на реализација на проектите. Општината полека но, сигурно, под водство на локалната самоуправа и градоначалникот Коњановски се обидуваат колку што можат повеќе проекти да реализираат, бидејќи претходната власт на СДСМ честопати му ги одземаше ингеренциите на градоначалникот и го кочеше напредокот на Битола. Иако имаме рецидиви од тоа време, сега сликата е поинаква. По донесувањето на ребалансот, ќе биде објавен Јавниот повик и само во овој период до крајот на оваа година и следната околу 14-15 милиони евра ќе бидат инвестирани во проекти за Битола, надвор од буџетот што го има Општина Битола – вети тој.
![](http://bitolskivesnik.mk/wp-content/uploads/2024/07/miczkoski-2-4.jpg)
Зборувајќи за реконструкцијата и изградбата на нов коловоз на влезот на Битола од страната на Прилеп, битолскиот градоначалник Тони Коњановски посочи дека освен современо булеварско решение, овој дел ќе добие комплетна инфраструктура, водоводна и канализациона мрежа и двоен цевковод.
–Станува збор за булеварски влез на Битола со пешачки и велосипедски патеки од страните. Конечно Битола добива влез како што му доликува на градот на конзулите. Посебна благодарност до напорите што ги имаше пратеничката група во изминатиот состав и за помошта од 110 милиони денари што тогаш беше доделена. Ова е исклучителен проект за битолчани. Сите правни постапки и регулативи се веќе завршени, во делот на експропријацијата и граѓаните се свесни дека ова е булеварско решение и мора да се реализира. Мора да предочам дека и јавните претпријатија и приватните компании се соочуваат со недостиг од работна сила особено во делот на професионалниот кадар што го имаат, но, се надевам дека овие недостатоци ќе се надминуваат и проектот ќе се реализира со предвидената динамика – рече градоначалникот Коњановски и додаде дека моментно на 16 локации во градот се изведуваат градежни активности.
![](http://bitolskivesnik.mk/wp-content/uploads/2024/07/miczkoski-3333.jpg)
Изведувач на проектот за булеварскиот влез во Битола од страната на Прилеп е градежната компанија „Гранит“.
Инаку, премиерот Мицкоски при денешната посета на Битола беше во обиколка и на спортско рекреативниот комплекс што никнува во Нова Битола со нови спортски игралишта на површина од над две илјади метри и на локацијата во поранешната Касарна каде што се гради новиот Противпожарен дом.
Васка М.Младеновска