Битолски Весник Весник што се чита и прераскажува 60 години со читателите
Со чистење на различни локации низ градот и на територијата на цела Општина Битола, денес започна тридневната акција „Генералка викенд“.
Ова е една од најмасовните акции во државата, која се реализира веќе петта година по ред, со единствена цел, да се обезбеди здрава животна средина и да се подигне свеста за зачувување на природата и нејзината заштита.
„Во оваа акција, граѓаните масовно се вклучуваат и даваат личен придонес во отстранувањето на непотребниот отпад.
Во текот на денешниот ден, сите битолски јавни претпријатија, работеа на различни депонии на терен со тешка и лесна механизација, на претходно определени локации. Во акцијата, покрај јавните претпријатија, се приклучија сите јавни институции, односно основните и средните училишта, факултетите, домовите за ученици и студенти, членови на урбаните и месните заедници, здруженијата на пензионери, општествено одговорни компании и поединци“-информираат од Општина Битола.
Од Битолската локална самоуправа додаваат дека акцијата ќе продолжи и за време на викендот, со активности за чистење на терен во градот, во околните села и на туристичките локации во Општината, од страна на голем број активисти, спортски клубови, здруженија, месно население, потпомогнато од јавните претпријатија.
„Апелот останува-секој од нас да се грижи за животната средина и сопствената околина 365 годишно-апелираат од Општина Битола.
