Битолски Весник Весник што се чита и прераскажува 60 години со читателите
ВМРО-ДПМНЕ соопшти дека на седницата на Централниот Комитет одржана на 29-ти овој месец, се разговарало за се погласните шпекулации дека за време на чествувањето на македонскиот национален празник Илинден ВМРО-ДПМНЕ наводно ќе организирала инциденти и насилства.
„Централниот Комитет исто така ги дискутираше и информациите за можно сценарио од одредени центри, да бидат исценирани насилства или какви било инциденти во време на одбележувањето и прославата, и истите да бидат наметнати како вина на ВМРО-ДПМНЕ и неговите членови и поддржувачи по истиот терк на настаните на 27-ми април оваа година, по што би следеле нови хајки и прогони против партијата, членството, и раководството, и би биле во правец на нарушување на угледот и имиџот на ВМРО-ДПМНЕ пред домашната и меѓународната јавност како демократска партија“ се вели во соопштението.
ЦК на ВМРО-ДПМНЕ донесе одлука јавно да ги повика членовите и поддржувачите на партијата овој пат да се воздржат од присуство на настаните кои ги организира Владата на СДС, а со цел да не бидат со умисла и со подготвено сценарио испровоцирани и навлечени на реакција, а потоа и обвинети дека предизвикале инцидент или насилство.
Ако некои сепак одлучат да присуствуваат, партијата ги повикува да бидат крајно воздржани на можни провокации и да не дозволат да бидат вовлечени во можни исценирани инциденти.
„ВМРО-ДПМНЕ ќе најде начин со соодветен чин да изрази почит и да го одбележи херојството на нашите предци во нивната борба и лична жртва за слободна, независна и демократска Република Македонија“, се вели во соопштението. Централниот Комитет на ВМРО-ДПМНЕ потсетува дека револтот на граѓаните од овој, според нив, капитулантски договор на марионетската влада на СДС не треба да биде насочен кон соседна Бугарија и нејзините претставници и граѓани.
„Истите како и секоја друга држава се борат за интересите на нивната држава и не сносат никаква вина што Владата на СДСМ носи незрели и штетни за нацијата одлуки од кои последиците ќе доаѓаат не толку денес, колку во наредните години. Начинот да се казни ова однесување е на следните избори кога повторно моќта ќе се врати во рацете на народот“, се наведува во соопштението.
