Битолскиот пазар доби шест нови павилјони за 90 продажни тезги

Министерството за локална самоуправа, Центарот за развој на Пелагонискиот плански регион и јавното претпријатие  „Пазари” од Битола, во понеделникот, го промовираа новиот реконструиран дел и павилјони на Регионалниот пазар во Битола.

Реализацијата на овој проект се изврши со финансиска поддршка од Програмата за рамномерен регионален развој, истакна Билјана Цветановска-Гугоска, државен секретар во Министерството за локална самоуправа.

– Владата на Република Македонија преку Министерството за локална самоуправа во рамки на политиките за рамномерен регионален развој издвојува средства за проекти кои овозможуваат квалитетен живот на граѓаните без разлика на местото на живеење. Реконструкцијата на регионалниот Пазар во Битола е од големо значење и е финансиран со околу шест милиони денари, од нив 4,6 милиони денари се средства на Министерството за локална самоуправа, истакна Цветановска-Гугоска.

Во изминатиот период, нагласи таа, од програмата на Министерството за локална самоуправа инвестирани се околу 14 милиони ерва за 500 проекти на целата територија на државата.

– Во 2016 година, средствата за проекти од програмата за рамномерен регионален развој беа двојно зголемени наспроти 2015 година и тие изнесуваат околу 4 милиони евра, рече Цветановска-Гугоска.

Со најновата инвестиција во ЈП „Пазари”-Битола, како што беше посочено, значително се менува ликот на една од најфреквентните локации во градот, Регионалниот зелен пазар кој се почесто обезбедува институционална поддршка.

– Реконструирана е површина од околу 1.000 метри квадратни со ново плато и нова подземна инфраструктура. На платото сега има шест нови павилјони на кои ќе се постават 90 продажни тезги. Со оваа инвестиција значително се подобрија условите за функционирање на пазарот, како за луѓето што ги пласираат земјоделските производители, така и за граѓаните кои купуваат од овој регионален пазар во Битола- посочи Емилиа Ѓероска, директор на Центарот за развој на Пелагонискиот плански регион.

Во наредниот период ЈП „Пазари”-Битола ќе инвестира во реконструкцијата на реонот за продажба на бижутерија и рачно изработени производи.

-Новите продажни тезги ќе ги изнајмуваме по истите цени како досега. Не е интенција на јавното претпријатие “Пазари” да ги зголемува приходите од изнајмувањето на новите  тезги, туку да се подобрат условите и за пазарџиите, продавачи и за купувачите.  Со овие реконструктивни зафати, Битолскиот пазар го доби приматот на еден од најдобро уредените пазари во Република Македонија, каде во претходните  неколку години се направија повеќе инвестициски циклуси- истакна првиот човек на јавнотопретпријатие “Пазари” од Битола, Сашо Стаматов.

Б.В.