Претставата “Слугинки“ на сцената на Интимниот театар во Битола

Синоќа, на младинската сцена при Интимниот  театар во  Битола се одигра претставата „Слугинки”  која ја изведоа  битолски актерки:  Ана Жежовска, Симеона Павловска и Симона Овезовска.

Претставата е по текстови од Жан Жене и Ева Енслер, а во режија на Димитар Шутевски.

-“Слугинки“  е претстава која што  зборува за бунтот и крикот на младата генерација која се соочува со низа на проблеми и конфликти меѓу луѓето во време кога светскиот капитал е репер за моќ и по инерција сме принудени да бидеме компромисни за компромис. Исплашени сме и не се осмелуваме да ја прескокнеме рампата и да се спротиставиме. Според ова се потврдува дека се губи средната класа денес и сите ние или сме во улога на господари или сме во улога на слуги. Но тоа се враќа како бумеранг и затоа ние и живееме дури на границата меѓу слугите и господарите-вели режисерот Димитар Шутевски.

Ова за нас е идеална прилика да го кажеме она што го чувствуваме  во моментот како млади луѓе, да бидеме храбри и да бидеме во исто време јасни, гласни и конструктивни со она што ќе го зборуваме, истакнуваат трите актерки во претставата.

-Ова е можност  да ги преживееме тие ситуации уште еднаш и од нашите лични проблеми да создадеме квалитетно уметничко дело. Симона со својата умереност ќе не убеди за момент да излеземе од удобната зона и да се спротиставиме на работите околу нас, Ана ќе не натера многу гласно да зборуваме за нашите проблеми, а Симеона ќе иницира да бидеме дрски кон оние кои се обидуваат да бидат над нас- истакнуваат актерките во претставата “Слугинки“ поставена на младинската сцена на Интимниот театар во Битола.

Б.В.