Битолски Весник Весник што се чита и прераскажува 60 години со читателите
Делегација од регионот Норманија од Франција која ја сочинуваат генералниот директор на Меморијалниот центар во Каен, Стефан Грималди и раководителот на одделот за изложби, Франк Мари, денеска и утре ќе престојуваат Македонија.
Како што информираа од Француската Амбасада, Грималди и Мари во придружба на амбасадорката на Република Франција, Лоренс Оер, денеска ќе ја посетат Битола за да се запознаат со активностите во врска со проектот за музејскиот простор којшто е во фаза на изградба на Француските воени гробишта во градот, а е посветен на борците од Источниот фронт.
Грималди и Мари се експерти од областа на музеографијата и историографијата, кои ја поддржуваат изградбата на меморијалниот комплекс, а кој, се посочува, ќе овозможи подобро запознавање со овој фронт. Во тек се значајни истражувачки активности и постапки за евидентирање, во функција на намената за зачувување на спомените и сеќавањата од тоа време.
Стефан Грималди од 2006 година е генерален директор на Меморијалниот центар во Каен, посветен на историјата на 20. век, а целата негова тематика се однесува на мирот. Со повеќе од 400.000 посетители годишно, овој центар е најпосетениот музеј во Франција надвор од регионот на Париз.
Инаку, во Меморијалниот центар во Каен од 9 март годинава поставена е изложбата „Фотографии од Источниот фронт“ од фотографското творештво на браќата Манаки, која ќе биде отворена се до 18 септември.
