Битолски Весник Весник што се чита и прераскажува 60 години со читателите
Денес ќе најавам еден проект кој како предлог произлезе од самите битолчани, по што извршивме и конкретна анализа на реалните потреби и оправданоста.
Општината ќе формира посебен Оддел за давање помош во домашни услови на старите и изнемоштени лица и лицата со посебни потреби.
Новата патронажна служба која ќе функционира во рамките на Домот за стари лица „Сју Рајдер“ и ќе ги сервисира граѓаните кои имаат потреба од домашна нега и грижа, а нивната состојба дозволува да се избегне згрижување во болница или геронтолошка установа.
Службата ќе обезбедува лична и домашна хигиена, подготвување на храна и исхрана, облекување, затоплување на просториите, придружување и обезбедување на преглед од матичен лекар, плаќање на сметки итн.
Проектот ќе чини 4.220.000 денари, а со реализација ќе почнеме на почетокот на следната година.
Во оваа прилика сакам да најавам уште една мерка на општината за подигнување на основната информатичка култура кај старите лица и лицата со попреченост.
Ќе ги субвенционираме постоечките и ќе организираме почетни курсеви за основно познавање на работа со компјутер, интернет, комуникација преку социјални мрежи и користење на мобилни апликации.
Ова е во прилог на нашата решеност општината, во рамките на своите надлежности, да биде општина на сите граѓани независно од возраста,истакна на прес конференцијата Зоран Илиоски,кандидат за градоначалник на Битола.
