Битолски Весник Весник што се чита и прераскажува 60 години со читателите
Француската актерка Жулиет Бинош, која доцна синоќа пристигна во Битола на ИФФК „Браќа Манаки”, денеска ги посети античкиот локалитет Хераклеја Линкестис, а подоцна замина во посета и на Охрид.
Според организаторите на фестивалот, на француската дива , која во моментот снима четири филмови, исклучително и се допаднала природата во Македонија, како и античките и средновековните локалитети.
Во текот на денешната екскурзија во Охрид ги разгледала црквата „Св Богородица Перивлепта”, Канео и Плаошник. Во галеријата на икони во музејскиот комплекс на црквата „Св. Богородица Перивлепта”, Жулиет Бинош, која и самата слика, останала цел час, задржувајќи се многу повеќе од предвиденото. Иконите во галеријата ги оценила како вистински ремек дела.
Вчера вечер, по пристигнувањето во Битола , таа побарала да проба македонски специјалитети, кои многу и допаднале, особено гравчето. Пробала мезиња, пити и други македонски традиционални јадења, како и ракија за која рекла дека ја освежила по долгото патување.
Јавниот разговор со неа е во недела од 11 часот во малата сала на Центарот за култура во Битола. Настанот ќе го модерираат Лабина Митевска и Жарко Кујунџиски.
Трисет и петото издание на „Браќа Манаки” почнува вечер во 20 часот. Покрај Бинош, во Битола се уште двајца оскаровци, Лука Бигаци и Крис Менџис.
На фестивалот два македонски филма ќе ги имаат своите премиери – „До балчак” на Столе Попов и „Децата на сонцето” на Антонио Митриќески. Вкупно 76 филма во осум категории ќе бидат прикажани на Фестивалот, меѓу кои и омаж на Милчо Манчевски. Годинашното јубилејно фестивалско издание се одвива под слоганот „Кон ѕвездите”.
Б.В.
