Битолски Весник Весник што се чита и прераскажува 60 години со читателите
Брачната двојка Магда (70) и Симон Пивковски (73) од Могила, денеска, дури по 52 години брак се венчаа в црква.
Венчавката се одржа во црквата во соседната општина Новаци во рамките на традиционалната манифестација „Македонска етно венчавка”, која секоја година во Новаци ја организираат Центарот за едукација и негување на традцијата и фолклор „Етно Илинден “ Битола, „Центарот за обука и примена” Битола како и културно иновативниот клуб од Новаци.
Манифестацијата се одржа под покровителство на градоначалникот на Новаци, Лазар Котевски.
-Прекрасно е чуството што дури по 52 години брак се венчавме в црква. Затоа голема благодарност до организаторите кои ни ја овозможија оваа наша веселба. Ние останавме толку долго невенчани само поради сплет на околности, изјавија Магда и Симон Пивковски, откако по 52 години брак, се заколнија на верност.
Во рамките на манифестацијата се одржа и „Ревија на македонски народни носии” , на која учествуваа претставници од повеќе региони во Македонија, кои што ги претставија своите специфични обележја на носиите од својот крај.
Годинава, на оваа традициолналана манифестација за прв пат се одржа и гастрономскиот натпревар во подготовка на традиционални и автентични јадења, со кои се претставува богатата ризница и богатото културно наследство за регионот на Пелагонија и Република Македонија .
Натпреварувањето се одржа во четири поединечни и една групна категорија, која соодветствува со манифестацијата, а тоа е „Подготовка и сервирање на маса за свадба”.
На манифестацијата сватовите и гостите како и многубројните присутни ги забавуваа КУД Новаци и повеќе културно уметнички друштва од регионот кои ја збогатија програмата.
